Health-and-Nutrition/C2/Vegetarian-recipes-for-7-month-old-babies/Kannada

Time	Narration
00:00	Vegetarian recipes for 7 month old babies ಎಂಬ ಸ್ಪೋಕನ್-ಟ್ಯುಟೋರಿಯಲ್ ಗೆ ನಿಮಗೆ ಸ್ವಾಗತ.
00:08	ಈ ಟ್ಯುಟೋರಿಯಲ್ ನಲ್ಲಿ, ನಾವು 7 ತಿಂಗಳ ವಯಸ್ಸಿನ ಶಿಶುಗಳಿಗೆ ಪೂರಕ ಆಹಾರದ ಮಹತ್ವ ಮತ್ತು
00:16	ಕೆಳಗೆ ವಿವರಿಸಿದ ಕೆಲವು ಸಸ್ಯಾಹಾರಿ ಪಾಕವಿಧಾನಗಳ ಬಗ್ಗೆ ಕಲಿಯುತ್ತೇವೆ: ಹಲಸಿನಹಣ್ಣಿನ ಬೀಜಗಳ ಗಂಜಿ,
00:23	ಹುರುಳಿಕಾಳು ಹಾಗೂ ರಾಜಗಿರಿ ಸೊಪ್ಪಿನ (ದಂಟಿನ ಸೊಪ್ಪು) ಗಂಜಿ,
00:26	ದಂಟಿನ ಸೊಪ್ಪು ಹಾಗೂ ಅಲಸಂದೆ ಕಾಳಿನ ಗಂಜಿ,
00:28	ಮೆಂತ್ಯದ ಸೊಪ್ಪು ಮತ್ತು ಬೀನ್ಸ್ ಗಂಜಿ, ಅರಕ (ಕೊಡೋ ಮಿಲ್ಲೆಟ್) ಹಾಗೂ ಕಡಲೆಕಾಳಿನ ಗಂಜಿ.
00:35	ಮೊದಲನೇ ವರ್ಷದಲ್ಲಿ, ಮಗು ತೆವಳಲು ಮತ್ತು ಚಲಿಸಲು ಆರಂಭಿಸಿದಾಗ ಬೆಳವಣಿಗೆಯು ತೀವ್ರವಾಗಿರುತ್ತದೆ.
00:43	ಮಗುವಿಗೆ ಶಕ್ತಿಯ ಅವಶ್ಯಕತೆ ಸಹ ಹೆಚ್ಚಾಗಿರುತ್ತದೆ.
00:48	6-8 ತಿಂಗಳ ವಯಸ್ಸಿನ ಶಿಶುಗಳಿಗೆ, ಪೂರಕ ಆಹಾರಗಳಿಂದ 200 ಕ್ಯಾಲೊರಿಗಳು ಬೇಕಾಗುತ್ತವೆ.
00:55	ಕೊಡುತ್ತಿರುವ ಆಹಾರದ ಪ್ರಮಾಣವನ್ನು ಕ್ರಮೇಣ ಹೆಚ್ಚಿಸಬೇಕಾಗುತ್ತದೆ.
00:59	ನೆನಪಿಡಿ, ಸಾಕಷ್ಟು ಪೂರಕ ಆಹಾರದ ಜೊತೆಗೆ ಸ್ತನ್ಯಪಾನವು ಸಹ ಅತ್ಯಂತ ಮುಖ್ಯವಾಗಿದೆ.
01:07	ಆದ್ದರಿಂದ ಮಗುವಿಗೆ ಏಳು ತಿಂಗಳಾದಾಗ, ದಿನಕ್ಕೆ ಮೂರು ಬಾರಿ ಅರ್ಧ ಕಪ್ ಪೂರಕ ಆಹಾರವನ್ನು ಕೊಡಲು ಪ್ರಾರಂಭಿಸಬೇಕು.
01:16	ಅರ್ಧ ಕಪ್ ಎಂದರೆ ಸುಮಾರು 125 ಮಿಲಿಲೀಟರ್ ಅಥವಾ 8 ಚಮಚ ಆಹಾರವಾಗಿದೆ.
01:22	6 ತಿಂಗಳ ಮಗುವಾಗಿದ್ದಾಗಲೇ ಪೂರಕ ಆಹಾರವನ್ನು ಪ್ರಾರಂಭಿಸಿದ್ದರಿಂದ
01:28	ಈಗ ಮಗು ವಿವಿಧ ಆಹಾರ ಪದಾರ್ಥಗಳಿಗೆ ಹೊಂದಿಕೊಂಡಿದೆ.
01:33	ಈಗ ಮಗುವಿಗೆ ಪೂರಕ ಆಹಾರಗಳನ್ನು ಪರಿಚಯಿಸಲು ಪ್ರಾರಂಭಿಸಿ.
01:38	ಗಮನಿಸಿ, ಹಿಸುಕಿ ಮೆತ್ತಗೆ ಮಾಡಿದ ಮತ್ತು ನುಣ್ಣಗಿರುವ ಆಹಾರವನ್ನು ಮಾತ್ರ ಕೊಡಬೇಕು.
01:44	ಮಗುವಿನ ಆಹಾರವು ಸ್ವಲ್ಪ ಗಟ್ಟಿಯಾಗಿದೆ, ನೀರಿನಂತೆ ತೆಳ್ಳಗಿಲ್ಲ ಎಂದು ಖಚಿತಪಡಿಸಿಕೊಳ್ಳಿ.
01:52	ಮಗುವಿನ ಆಹಾರವನ್ನು ತಯಾರಿಸುವಾಗ ಸ್ಥಳೀಯ ಮತ್ತು ಕಾಲೋಚಿತ ಪದಾರ್ಥಗಳನ್ನು ಬಳಸಿ.
01:59	ಎಣ್ಣೆಬೀಜಗಳು ಮತ್ತು ಬೀಜಗಳ ಪುಡಿ, ಮೊಳಕೆಯೊಡೆದ ಕಾಳುಗಳ ಪುಡಿ, ಕರಿಬೇವಿನ ಎಲೆಗಳ ಪುಡಿ, ನುಗ್ಗೆ ಎಲೆಗಳ ಪುಡಿ ಮುಂತಾದ
02:08	ವಿವಿಧ ಪೌಷ್ಟಿಕ ಪುಡಿಗಳನ್ನು ಸೇರಿಸಲು ಸಹ ನೆನಪಿಡಿ.
02:11	ಇದೇ ಸರಣಿಯ ಮತ್ತೊಂದು ಟ್ಯುಟೋರಿಯಲ್ ನಲ್ಲಿ ಇದನ್ನು ವಿವರಿಸಲಾಗಿದೆ.
02:17	ಮಗುವಿಗೆ ಒಂದು ವರ್ಷ ಆಗುವವರೆಗೆ ಅದರ ಆಹಾರದಲ್ಲಿ ಉಪ್ಪು ಸೇರಿಸಬೇಡಿ.
02:21	ಮತ್ತು, ಎರಡು ವರ್ಷವಾಗುವವರೆಗೆ ಅದರ ಆಹಾರದಲ್ಲಿ ಸಕ್ಕರೆ, ಬೆಲ್ಲವನ್ನು ಸೇರಿಸಬೇಡಿ.
02:27	ಮಗುವಿಗೆ ಪೂರಕ ಆಹಾರವಾಗಿ ಬಳಸಬಹುದಾದ ಕೆಲವು ಸಸ್ಯಾಹಾರಿ ಅಡುಗೆಗಳನ್ನು ಈಗ ನಾವು ನೋಡೋಣ.
02:35	ಮೊದಲನೆಯದಾಗಿ ಹಲಸಿನಹಣ್ಣಿನ ಬೀಜಗಳ ಗಂಜಿಯನ್ನು ತಯಾರಿಸುವುದು.
02:39	ಬೇಕಾಗುವ ಸಾಮಾನು: 15-20 ಹಲಸಿನಹಣ್ಣಿನ ಬೀಜಗಳು, ಒಂದು ಸಣ್ಣ ಅಥವಾ ದೊಡ್ಡದಿದ್ದರೆ ಅರ್ಧ ಬಾಳೆಹಣ್ಣು,
02:48	ತೆಂಗಿನ ಹಾಲು ಅಥವಾ ಎದೆ ಹಾಲು,
02:50	ಒಂದು ಟೀಚಮಚ ಎಣ್ಣೆಬೀಜಗಳು ಮತ್ತು ಬೀಜಗಳ ಪುಡಿ.
02:53	ಹಲಸಿನಹಣ್ಣಿನ ಬೀಜಗಳ ಗಂಜಿ ತಯಾರಿಸಲು: ಹಲಸಿನ ಬೀಜಗಳನ್ನು ಚೆನ್ನಾಗಿ ತೊಳೆಯಿರಿ.
02:59	ಈ ಬೀಜಗಳನ್ನು ಒಂದು ಸ್ಟೀಲ್ ಪಾತ್ರೆಯಲ್ಲಿ ಇರಿಸಿ, ಬೀಜಗಳು ಮುಚ್ಚುವವರೆಗೆ ನೀರು ಸೇರಿಸಿ.
03:06	ಪ್ರೆಷರ್ ಕುಕ್ಕರ್ ನಲ್ಲಿ 5-6 ಸೀಟಿ ಆಗುವವರೆಗೆ ಬೇಯಿಸಿ.
03:09	ಈ ಬೀಜಗಳನ್ನು ಒಂದು ತಟ್ಟೆಗೆ ವರ್ಗಾಯಿಸಿ ಮತ್ತು ಇವು ತಣ್ಣಗಾಗಲು ಬಿಡಿ.
03:16	ನಂತರ ಅವುಗಳ ಹೊರಗಿನ ಸಿಪ್ಪೆಯನ್ನು ಸುಲಿಯಿರಿ.
03:20	ಆಮೇಲೆ, ಮಿಕ್ಸರ್ ಅಥವಾ ಕಲ್ಲಿನ ಗ್ರೈಂಡರ್ ಬಳಸಿ ನುಣ್ಣಗೆ ಪೇಸ್ಟ್ ಮಾಡಿ.
03:25	ಕಳಿತ ಬಾಳೆಹಣ್ಣಿನ ಸಿಪ್ಪೆ ಸುಲಿದು ಚಮಚದಿಂದ ಅದನ್ನು ಚೆನ್ನಾಗಿ ಹಿಸುಕಿ.
03:32	ಈಗ ಹಿಸುಕಿದ ಬಾಳೆಹಣ್ಣು ಮತ್ತು ಹಲಸಿನ ಬೀಜಗಳ ಪ್ಯೂರಿಯನ್ನು ಮಿಶ್ರಣ ಮಾಡಿ.
03:37	ಇದರಲ್ಲಿ 2 ಟೇಬಲ್ ಚಮಚ ತೆಂಗಿನ ಹಾಲು ಅಥವಾ ಎದೆಹಾಲು ಸೇರಿಸಿ.
03:42	ಅದರಲ್ಲಿ ಎಣ್ಣೆಬೀಜಗಳು ಮತ್ತು ಬೀಜಗಳ ಪುಡಿಯನ್ನು ಸೇರಿಸಿ.
03:45	ಚೆನ್ನಾಗಿ ಬೆರೆಸಿ.
03:47	ಈ ಮಿಶ್ರಣವನ್ನು 3-4 ನಿಮಿಷಗಳ ಕಾಲ ಸಣ್ಣಉರಿಯಲ್ಲಿ ಬೇಯಿಸಿ.
03:52	ಹಲಸಿನಹಣ್ಣಿನ ಬೀಜಗಳ ಗಂಜಿ ಸಿದ್ಧವಾಗಿದೆ.
03:56	ಈ ಗಂಜಿಯಲ್ಲಿ: ಪ್ರೋಟೀನ್,
03:59	ಒಮೆಗಾ 3 ಕೊಬ್ಬಿನಾಮ್ಲಗಳು,
04:02	ಪೊಟ್ಯಾಸಿಯಮ್ ಮತ್ತು ರಂಜಕಗಳು ಸಮೃದ್ಧವಾಗಿವೆ.
04:06	ಎರಡನೆಯ ಪಾಕವಿಧಾನವು ಹುರುಳಿಕಾಳು ಹಾಗೂ ದಂಟಿನ ಸೊಪ್ಪಿನ ಗಂಜಿ ಆಗಿದೆ.
04:11	ಇದನ್ನು ತಯಾರಿಸಲು ನಮಗೆ: 2 ಟೇಬಲ್ ಚಮಚ ಹುರುಳಿಕಾಳಿನ ಪುಡಿ, 2 ಕಪ್ ತೊಳೆದ ದಂಟಿನ ಸೊಪ್ಪು (ಅಮರಾಂತ್ ಎಲೆಗಳು),
04:19	¼ ಟೀಸ್ಪೂನ್ ಕರಿಬೇವಿನ ಎಲೆಗಳ ಪುಡಿ, ½ ಟೀಚಮಚ ತುಪ್ಪ ಇವುಗಳು ಬೇಕಾಗುತ್ತವೆ.
04:24	ವಿಧಾನ: ಮೊದಲು, ಹುರುಳಿಕಾಳನ್ನು 7 ರಿಂದ 8 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ.
04:31	ಆನಂತರ ಅದನ್ನು ಒಂದು ಜರಡಿಯಲ್ಲಿ ಹಾಕಿ ನೀರಿನಿಂದ ಚೆನ್ನಾಗಿ ತೊಳೆಯಿರಿ.
04:37	ಎಲ್ಲಾ ನೀರು ಬಸಿಯಿರಿ. ಈಗ ಶುಚಿಯಾದ ಒಂದು ಹತ್ತಿಬಟ್ಟೆಯಲ್ಲಿ ಕಟ್ಟಿ ಮೊಳಕೆ ಬರುವವರೆಗೆ ಅದನ್ನು ಬದಿಗೆ ಇರಿಸಿ.
04:47	ಮೊಳಕೆಯೊಡೆದ ಈ ಹುರುಳಿಕಾಳನ್ನು ಬಿಸಿಲಿನಲ್ಲಿ ಒಂದೆರಡು ದಿನ ಒಣಗಿಸಿ.
04:52	ಇದನ್ನು ಸಣ್ಣಉರಿಯಲ್ಲಿ 8-10 ನಿಮಿಷಗಳ ಕಾಲ ಹುರಿಯಿರಿ. ನಂತರ ತಣ್ಣಗಾಗಲು ಬಿಡಿ.
04:58	ಈಗ ಅದರ ಪುಡಿಯನ್ನು ತಯಾರಿಸಿ. ಈ ಸಂಪೂರ್ಣ ಪ್ರಕ್ರಿಯೆಯನ್ನು ಮಾಲ್ಟಿಂಗ್ ಎನ್ನುತ್ತೇವೆ.
05:05	ಒಂದು ಬಾಣಲೆಯಲ್ಲಿ ತುಪ್ಪವನ್ನು ಬಿಸಿ ಮಾಡಿ.
05:10	ಅದರಲ್ಲಿ ತೊಳೆದ ದಂಟಿನ ಸೊಪ್ಪನ್ನು ಸೇರಿಸಿ.
05:13	ಇದನ್ನು 4-5 ನಿಮಿಷ ಹುರಿಯಿರಿ. ಈಗ ತಣ್ಣಗಾಗಲು ಬಿಡಿ.
05:17	ಮಿಕ್ಸರ್ ಅಥವಾ ಕಲ್ಲಿನ ಗ್ರೈಂಡರ್ ಬಳಸಿ ಅದರ ಪ್ಯೂರಿಯನ್ನು ತಯಾರಿಸಿ.
05:23	ನಂತರ, ಹುರುಳಿಕಾಳಿನ ಪುಡಿಯಲ್ಲಿ 2 ಟೇಬಲ್ ಚಮಚ ನೀರು ಸೇರಿಸಿ.
05:28	ಗಂಟುಗಳು ಆಗದಂತೆ ಅದನ್ನು ಚೆನ್ನಾಗಿ ಬೆರೆಸಿ.
05:32	ಈ ತೆಳುವಾದ ಪೇಸ್ಟ್ ಅನ್ನು ಸಣ್ಣಉರಿಯಲ್ಲಿ 6-7 ನಿಮಿಷ ಬೇಯಿಸಿ.
05:37	ಈಗ, ಈ ಹುರುಳಿಕಾಳಿನ ಪೇಸ್ಟ್ ನಲ್ಲಿ ದಂಟಿನ ಸೊಪ್ಪಿನ ಪ್ಯೂರೀಯನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
05:43	ಇದನ್ನು 2-3 ನಿಮಿಷಗಳ ಕಾಲ ಸಣ್ಣ ಉರಿಯಲ್ಲಿ ಬೇಯಿಸಿ.
05:48	ಅದರಲ್ಲಿ ಕರಿಬೇವಿನ ಪುಡಿಯನ್ನು ಸೇರಿಸಿ, ಚೆನ್ನಾಗಿ ಬೆರೆಸಿ.
05:52	ಇದನ್ನು ಒಲೆಯಿಂದ ಇಳಿಸಿ. ಈಗ ಹುರುಳಿಕಾಳು ಹಾಗೂ ದಂಟಿನ ಸೊಪ್ಪಿನ ಗಂಜಿ ಸಿದ್ಧವಾಗಿದೆ.
05:59	ಈ ಗಂಜಿಯು ಪ್ರೋಟೀನ್, ಒಮೆಗಾ 3 ಕೊಬ್ಬಿನಾಮ್ಲಗಳು, ಕ್ಯಾಲ್ಶಿಯಂ,
06:06	ರಂಜಕ, ಕಬ್ಬಿಣ ಹಾಗೂ ಪೊಟ್ಯಾಸಿಯಮ್ ಗಳನ್ನು ಹೇರಳವಾಗಿ ಹೊಂದಿದೆ.
06:10	ಗಮನಿಸಿ, ಈ ಗಂಜಿಗಳನ್ನು ತಯಾರಿಸಲು ನೀವು ಸ್ಥಳೀಯವಾಗಿ ಲಭ್ಯವಿರುವ ಯಾವುದೇ ಬೀನ್ಸ್ ಮತ್ತು ಸೊಪ್ಪುಗಳನ್ನು ಬಳಸಬಹುದು.
06:20	ಯಾವಾಗಲೂ ಬೀನ್ಸ್ ಅನ್ನು ಜೋಳ, ರಾಗಿ, ಅರಕ (ಕೊಡೋ ಮಿಲ್ಲೆಟ್) ಇತ್ಯಾದಿ ಧಾನ್ಯಗಳೊಂದಿಗೆ ಬಳಸಲು ಪ್ರಯತ್ನಿಸಿ.
06:31	ಇದರಿಂದ ಮಗುವಿಗೆ ಸಂಪೂರ್ಣ ಪ್ರೋಟೀನ್ ಸಿಗುತ್ತದೆ.
06:35	ನೀವು ಈ ಧಾನ್ಯಗಳ ಮಾಲ್ಟ್ ಗಳನ್ನು (ಪುಡಿ) ಮಗುವಿನ ಆಹಾರದಲ್ಲಿ ಸೇರಿಸಬಹುದು ಅಥವಾ
06:42	ಬೇಯಿಸಿದ ಮೊಳಕೆಕಾಳುಗಳನ್ನು ನುಣ್ಣಗೆ ಪೇಸ್ಟ್ ಮಾಡಿ ಈ ಗಂಜಿಗಳಲ್ಲಿ ಸೇರಿಸಬಹುದು.
06:48	ಮೂರನೆಯ ಪಾಕವಿಧಾನವು ದಂಟಿನ ಸೊಪ್ಪು ಹಾಗೂ ಅಲಸಂದೆ ಕಾಳಿನ ಗಂಜಿ ಆಗಿದೆ.
06:53	ಇದಕ್ಕಾಗಿ ನಿಮಗೆ: 2 ಟೇಬಲ್-ಚಮಚ ಮಾಲ್ಟೆಡ್ ರಾಜಗಿರಿ (ಅಮರಾಂತ್) ಪುಡಿ,
06:59	2 ಟೇಬಲ್-ಚಮಚ ಮೊಳಕೆಯೊಡೆದ ಅಲಸಂದೆ ಕಾಳುಗಳ ಪ್ಯೂರೆ ಮತ್ತು ¼ ಟೀಚಮಚ ನುಗ್ಗೆ ಎಲೆಗಳ ಪುಡಿ ಇವುಗಳು ಬೇಕು.
07:06	ವಿಧಾನ: ಮಾಲ್ಟೆಡ್ ರಾಜಗಿರಿ ಪುಡಿಯನ್ನು ತಯಾರಿಸಲು, ಇದೇ ಟ್ಯುಟೋರಿಯಲ್ ನ ಹಿಂದಿನ ಪಾಕವಿಧಾನದಲ್ಲಿ ವಿವರಿಸಿದ ಸೂಚನೆಗಳನ್ನು ಅನುಸರಿಸಿ.
07:17	ಮೊಳಕೆಯೊಡೆದ ಅಲಸಂದೆ ಕಾಳುಗಳನ್ನು ಒಂದು ಸ್ಟೀಲ್ ಪಾತ್ರೆಯಲ್ಲಿ ತೆಗೆದುಕೊಳ್ಳಿ. ಪ್ರೆಷರ್ ಕುಕ್ಕರ್ ನಲ್ಲಿ ಇದನ್ನು 4 ರಿಂದ 5 ಸೀಟಿಗಳವರೆಗೆ ಬೇಯಿಸಿ.
07:26	ಈಗ ಬೇಯಿಸಿದ ಈ ಅಲಸಂದೆ ಕಾಳುಗಳ ಪ್ಯೂರೆಯನ್ನು ತಯಾರಿಸಿ.
07:30	ನಂತರ, ಒಂದು ಬಟ್ಟಲಿನಲ್ಲಿ ಎರಡು ಚಮಚ ಮಾಲ್ಟೆಡ್ ರಾಜಗಿರಿ ಪುಡಿಯನ್ನು ತೆಗೆದುಕೊಳ್ಳಿ. ಅದರಲ್ಲಿ ಸಾಕಷ್ಟು ನೀರು ಸೇರಿಸಿ.
07:38	ಗಂಟುಗಳಾಗದಂತೆ ಇದನ್ನು ಚೆನ್ನಾಗಿ ಮಿಶ್ರಣ ಮಾಡಿ.
07:42	ಈ ತೆಳುವಾದ ಪೇಸ್ಟ್ ಅನ್ನು ಸಣ್ಣಉರಿಯಲ್ಲಿ 2-3 ನಿಮಿಷ ಬೇಯಿಸಿ. ಅದರಲ್ಲಿ ಅಲಸಂದೆ ಕಾಳುಗಳ ಪ್ಯೂರೆಯನ್ನು ಸೇರಿಸಿ.
07:52	ಇದನ್ನು ಚೆನ್ನಾಗಿ ಬೆರೆಸಿ, 4-5 ನಿಮಿಷ ಬೇಯಿಸಿ. ನಂತರ ಒಲೆಯಿಂದ ಕೆಳಗಿಳಿಸಿ.
07:58	ಕೊನೆಗೆ, ಈ ಬೇಯಿಸಿದ ಗಂಜಿಯಲ್ಲಿ ¼ ಟೀಸ್ಪೂನ್ ನುಗ್ಗೆಎಲೆಗಳ ಪುಡಿಯನ್ನು ಸೇರಿಸಿ. ದಂಟಿನ ಸೊಪ್ಪು ಹಾಗೂ ಅಲಸಂದೆ ಕಾಳಿನ ಗಂಜಿ ಸಿದ್ಧವಾಗಿದೆ.
08:09	ಈ ಗಂಜಿಯು: ಪ್ರೋಟೀನ್, ಒಮೆಗಾ 3 ಕೊಬ್ಬಿನಾಮ್ಲಗಳು,
08:17	ರಂಜಕ, ಮೆಗ್ನೀಸಿಯಮ್, ಕಬ್ಬಿಣ, ಪೊಟ್ಯಾಸಿಯಮ್
08:20	ಹಾಗೂ ಕ್ಯಾಲ್ಶಿಯಂ ಗಳನ್ನು ಹೇರಳವಾಗಿ ಹೊಂದಿದೆ.
08:24	ಈ ಗಂಜಿಗಳನ್ನು ತಯಾರಿಸಲು, ನೀವು ರಾಗಿ, ಜೋಳ, ಮಡಿಕೆಕಾಳು, ಕಡಲೆ ಇತ್ಯಾದಿ
08:32	ಮೊಳಕೆಯೊಡೆದ ಕಾಳುಗಳನ್ನು ಒಟ್ಟಿಗೆ ಬಳಸಬಹುದು.
08:37	ನಾಲ್ಕನೆಯದು ಮೆಂತ್ಯದ ಸೊಪ್ಪು ಮತ್ತು ಬೀನ್ಸ್ ಗಂಜಿ ಆಗಿದೆ.
08:41	ಅಗತ್ಯವಿರುವ ಪದಾರ್ಥಗಳು: 2 ಕಪ್ ತೊಳೆದು ಆರಿಸಿದ ಮೆಂತ್ಯದ ಸೊಪ್ಪು, 1 ಟೀಸ್ಪೂನ್ ತುಪ್ಪ,
08:49	2 ಟೇಬಲ್-ಚಮಚ ಹಸಿ ಕೊಬ್ಬರಿ ಪೇಸ್ಟ್‌,
08:52	2 ಟೇಬಲ್-ಚಮಚ ಮೊಳಕೆಯೊಡೆದ ಬೀನ್ಸ್‌ ಪುಡಿ,
08:56	ಬೀನ್ಸ್ ಪುಡಿಯನ್ನು ತಯಾರಿಸಲು, ಇದೇ ಸರಣಿಯ ಮತ್ತೊಂದು ಟ್ಯುಟೋರಿಯಲ್ ನಲ್ಲಿ ವಿವರಿಸಲಾದ ಸೂಚನೆಗಳನ್ನು ಅನುಸರಿಸಿ.
09:04	ವಿಧಾನ: ಬಾಣಲೆಯಲ್ಲಿ 1 ಟೀಸ್ಪೂನ್ ತುಪ್ಪವನ್ನು ಬಿಸಿಮಾಡಿ.
09:09	ಮೆಂತ್ಯದ ಸೊಪ್ಪನ್ನು ಸೇರಿಸಿ 2-3 ನಿಮಿಷ ಬೇಯಿಸಿ.
09:13	ಅದನ್ನು ಶುಚಿಯಾದ ಒಂದು ತಟ್ಟೆಗೆ ವರ್ಗಾಯಿಸಿ, ತಣ್ಣಗಾಗಲು ಸ್ವಲ್ಪ ಸಮಯ ಬಿಡಿ.
09:18	ನಂತರ, ಗ್ರೈಂಡರ್ ಅಥವಾ ಮಿಕ್ಸರ್ ಬಳಸಿ ಅದರ ಪ್ಯೂರೆಯನ್ನು ತಯಾರಿಸಿ.
09:23	ಈ ಪ್ಯೂರೀಯನ್ನು ಮಂದ ಉರಿಯಲ್ಲಿ ಒಂದು ನಿಮಿಷ ಬೇಯಿಸಿ. ಇದರಲ್ಲಿ 2 ಟೇಬಲ್-ಚಮಚ ಬೀನ್ಸ್ ಪುಡಿಯನ್ನು ಸೇರಿಸಿ.
09:31	ಗಂಟುಗಳಾಗದಂತೆ ಇದನ್ನು ಚೆನ್ನಾಗಿ ಮಿಶ್ರಣ ಮಾಡಿ.
09:35	ಅಗತ್ಯವಿದ್ದರೆ ಅದರಲ್ಲಿ ಸ್ವಲ್ಪ ನೀರನ್ನು ಸೇರಿಸಿಕೊಳ್ಳಿ.
09:40	ಈಗ ಅದರಲ್ಲಿ 2 ಟೇಬಲ್-ಚಮಚ ತೆಂಗಿನಕಾಯಿ ಪೇಸ್ಟ್ ಅನ್ನು ಸೇರಿಸಿ.
09:44	ತೆಂಗಿನಕಾಯಿ ಪೇಸ್ಟ್ ತಯಾರಿಸಲು, ಕಾಯಿತುರಿಯನ್ನು ನುಣ್ಣಗೆ ರುಬ್ಬಿ.
09:51	ನಂತರ ಈ ಮಿಶ್ರಣವನ್ನು 7-8 ನಿಮಿಷಗಳ ಕಾಲ ನಿರಂತರವಾಗಿ ಕಲಕುತ್ತ ಸಣ್ಣ ಉರಿಯಲ್ಲಿ ಬೇಯಿಸಿ.
09:58	ಈಗ ಮೆಂತ್ಯದ ಸೊಪ್ಪು ಹಾಗೂ ಬೀನ್ಸ್ ಗಂಜಿಯು ಸಿದ್ಧವಾಗಿದೆ.
10:03	ಈ ಮೆಂತ್ಯದ ಸೊಪ್ಪು ಹಾಗೂ ಬೀನ್ಸ್ ಗಂಜಿಯು: ಪ್ರೋಟೀನ್, ಒಮೆಗಾ 3 ಕೊಬ್ಬಿನಾಮ್ಲಗಳು,
10:10	ಫೋಲೇಟ್, ಕಬ್ಬಿಣ,
10:12	ಕ್ಯಾಲ್ಶಿಯಂ, ರಂಜಕ,
10:14	ಸತುವು ಹಾಗೂ ಪೊಟ್ಯಾಸಿಯಮ್ ಗಳಲ್ಲಿ ಸಮೃದ್ಧವಾಗಿದೆ.
10:16	ಈ ಪಾಕವಿಧಾನವನ್ನು ತಯಾರಿಸುವಾಗ, ಮೊದಲೇ ವಿವರಿಸಿದಂತೆ ವಿವಿಧ ಧಾನ್ಯಗಳು ಮತ್ತು ಮಿಲ್ಲೆಟ್ ಗಳನ್ನು ಸೇರಿಸಲು ಮರೆಯಬೇಡಿ.
10:27	ಐದನೇ ಪಾಕವಿಧಾನ ಅರಕ (ಕೊಡೋ ಮಿಲ್ಲೆಟ್) ಹಾಗೂ ಕಡಲೆಕಾಳಿನ ಪ್ಯೂರೆ ಆಗಿದೆ.
10:32	ಬೇಕಾಗುವ ಪದಾರ್ಥಗಳು: 2 ಟೇಬಲ್-ಚಮಚ ಅರಕ (ಕೊಡೋ ಮಿಲ್ಲೆಟ್),
10:35	2 ಟೇಬಲ್-ಚಮಚ ಮೊಳಕೆಯೊಡೆದ ಕಡಲೆಕಾಳು,
10:38	3 ಟೇಬಲ್-ಚಮಚ ತೆಂಗಿನ ಹಾಲು ಮತ್ತು 1 ಟೀ ಚಮಚ ತುಪ್ಪ.
10:43	ವಿಧಾನ: ಒಂದು ಸ್ಟೀಲ್ ಪಾತ್ರೆಯಲ್ಲಿ 2 ಚಮಚ ಅರಕ ತೆಗೆದುಕೊಳ್ಳಿ.
10:48	ಅದನ್ನು ಚೆನ್ನಾಗಿ ತೊಳೆಯಿರಿ. ನಂತರ ಅದರಲ್ಲಿ 3-4 ಟೇಬಲ್-ಚಮಚ ನೀರನ್ನು ಸೇರಿಸಿ.
10:55	ಪ್ರೆಷರ್ ಕುಕ್ಕರ್ ನಲ್ಲಿ 3-4 ಸೀಟಿ ಆಗುವವರೆಗೆ ಬೇಯಿಸಿ.
10:58	ಮೊಳಕೆಯೊಡೆದ ಕಡಲೆಕಾಳನ್ನು ಪ್ರೆಷರ್ ಕುಕ್ಕರ್ ನಲ್ಲಿ 4-5 ಸೀಟಿ ಆಗುವವರೆಗೆ ಬೇಯಿಸಿ.
11:04	ನಂತರ ಅದರ ಪ್ಯೂರೆಯನ್ನು ತಯಾರಿಸಿ.
11:07	ಸ್ಟೀಲ್ ಪಾತ್ರೆಯಲ್ಲಿ 1 ಟೀಸ್ಪೂನ್ ತುಪ್ಪವನ್ನು ಬಿಸಿ ಮಾಡಿ.
11:11	ಅದರಲ್ಲಿ ಬೇಯಿಸಿದ ಅರಕ, ಕಡಲೆಕಾಳಿನ ಪ್ಯೂರೆ ಮತ್ತು ತೆಂಗಿನ ಹಾಲು ಸೇರಿಸಿ. ಇದನ್ನು ಚೆನ್ನಾಗಿ ಬೆರೆಸಿ.
11:18	4-5 ನಿಮಿಷ ಬೇಯಿಸಿ ಇದನ್ನು ತಣ್ಣಗಾಗಲು ಬಿಡಿ. ಈಗ, ಅರಕ ಹಾಗೂ ಕಡಲೆಕಾಳಿನ ಪ್ಯೂರೆ ಸಿದ್ಧವಾಗಿದೆ.
11:27	ಈ ಪ್ಯೂರೆ: ಪ್ರೋಟೀನ್, ಕಬ್ಬಿಣ,
11:30	ರಂಜಕ, ಮೆಗ್ನೀಸಿಯಮ್,
11:33	ಕ್ಯಾಲ್ಸಿಯಂ ಮತ್ತು ಪೊಟ್ಯಾಸಿಯಮ್ ಗಳಲ್ಲಿ ಸಮೃದ್ಧವಾಗಿದೆ.
11:36	ಇಲ್ಲಿಗೆ ನಾವು ಈ ಟ್ಯುಟೋರಿಯಲ್ ನ ಕೊನೆಗೆ ಬಂದಿದ್ದೇವೆ. ಈ ಸ್ಕ್ರಿಪ್ಟ್ ನ ಅನುವಾದಕಿ IIT Bombay ಯಿಂದ ಸಂಧ್ಯಾ ಪುಣೇಕರ್ ಹಾಗೂ ಧ್ವನಿ ಶ್ರೀಮತಿ ನಯನಾ ಭಟ್. ಧನ್ಯವಾದಗಳು.

Contributors and Content Editors

Sandhya.np14